Brayɛ, Bragor na Kyirbra

Brayɛ

Adze a Akanfo dze hu dɛ ɔbaa edu ne mpanyin mu nye brayɛ. Brayɛ anaa Bra yɛ bɔgya a ofi basia n’awodze mu pue bosoom bosoom. Dzin ahorow a wcdze frɛ Brayɛ nye ‘bra, kyima anaa mfikyir kɔ.

Sɛ basiaba nyin du beebi a, no honandua hyɛ ase sesa. No honam yɛ frɔmm. Ne sisiw yɛ kɛse, no koko bae, n’enumfu hyɛ ase yɛ akɛse. Ebɔhwɛ no yie no, nna ɔahyɛ ase rikyima. Bosoom biara ohu bɔgya enyim. Sɛ ne maame hu dɛm a ɔhyɛ ase kyerɛkyerɛ no mbrɛ obesi esiesie noho. Nna ɛkyer dɛ abofra no ayɛ bra. Ɔaso awar. Iyi ntsi, maame no kɔbɔ ɔbaahembaa amandzɛɛ. Sɛ ɔhembaa bɔhwɛ na ɔyɛ ampa a, wɔhyɛ da gor no bra. S wɔanngor no bra na onyinsen a, wɔka dɛ ɔayɛ kyirbra. Iyi yɛ enyimguase ma abofra no na n’ebusua nyina. Iyi ntsi ɔyɛ awofo no hɔn asɛdze dɛ wɔbɛtsetse no yie amma cannkɛfa asɛm ammba.

Bragor

Bragor yɛ amandze bi a wɔyɛ dze ma basia a oedu ne mpanyin mfe do dze no rehɛn no akɔ mpanyin mu. Botae tsitir ntsi a wɔgor basia bi bra nye dɛ wɔyɛ dze yi basia no kyerɛ dɛ ɔeedu ne mpanyin mfe mu. Ɔnam dɛm ntsi sɛ banyin biara a ɔpɛ no awar no botum akɔ n’ebusuafo hɔ ekobisa n’ase awar.

Bragor Ahorow

Bragor gu mu ahorow ebien. Hɔn nye;

Dza wɔgor no wɔ fie. Iyi no awofo no kc ho ebisa hwehwɛ sɛ hɔn ba no kra pɛ bagua mu adzeyɛ anaa ɔmmpɛ. Sɛ ɔkra no mmpɛ a, wɔka n’ano wɔ fie.
Dza wɔdze no pue guamu. Wɔkɔ ebisaa no na sɛ ɔkra no pɛ gua mu adze yɛ a, wɔhyehyɛ no gor no wɔ bagua mu dɔ dza awofo no hɔn ahom botum.

Ahoboa na Amandze

Bragor no su ayɛ d afahyɛ. Ne dɛm no ntsi, branyi nye n’awofo hwehwɛ ndzqmba bi ama da no dur a woetum agor bra no ma ay enyimnyamhyɛ ama branyi no nye n’ebusua. Ndzɛmba a wɔhwehwɛ no bi nye ndziban ahorow tse dɛ ɔbɛsɛborɛdze, apentu, bayer, mankanyi, nna dza ɔkekaho. Wɔsan so hwehwɛ nam ahorow tse dɛ mpunam, nkokɔ, nkyirefuwa, ɔson no nwoma nye nam nye dza ɔkeka ho. Afei, wɔsan hwehwɛ afadze bi tse dɛ ahembaa mpaboa, kente, sikadwindze, anwendzepa, nduukuu, amoase, adaka a wɔdze ndzɛmba gu mu. No koraa no wɔhwehwɛ yabaa, asɛsɛgua, kɛtɛ na adze.

Dɛm ber yi a wɔrohwehwɛ ndzɛmba yi nna wɔahyɛ da ato hɔ dadaw. Wɔ dapɛn no mu nda no nyina Akanfo gyedzi dɛ Dwowda na ɔyɛ da a ɔdwe. Ɔno fi hɔ a Benada na Yawda nye nda a wɔgyedzi dɛ wɔdwe. Iyi ntsi wɔfa nda yi mu kor dɛ ɔno na wɔdze bedzi dwuma no.