Ayan Kasa

Ayan Kasa yɛ kwan a ɔkyerɛma fa do dze kyen kasa kyerɛ nyimpadɔm.(Krampa, D.E.K.(1997).Binom kyerɛ dɛ, Yan n'ase nye dɛ 'bɔ', mbom ɔnnyɛ bɔ kɛkɛ na ɔyɛ bɔ ma nyimpa enyi mbra noho do.

Abakɔsɛm

Yan fi kasafua nyan (awake) mu. Iyi ntsi ber biara a ebɛtse kyen kasa no, ɔma w'enyi ba woho do osiandɛ ɔda ehintasɛm, anwanwasɛm, mpɔfirmusɛm na ehiasɛm edzi. Akyerɛma nkotsee na wɔyan kyen. Ɔkyerɛma biara yɛ banyin osiandɛ ɔbaa nnyan kyen wɔ Akanman mu dɛ mbrɛ amambra tse no. Akyen ahorow a yɛdze kasa wɔ Akanman mu no bi nye; Asafokyen, Etumpan, Kyen Sin, Frɔm, Kyen kɛse, dondohen na dawur.

Akyen Ahorow A Yɛdze Kasa Wɔ Akanman Mu

Asafokyen

Dɛm kyen yi asafomba na wɔdze tu sa. Ɔyɛ kyen a ɔwar du Ɔkyerɛma n'ayerɛadze. Ɔdze sɛn ne nkyɛmfamu na ɔbɔ, otum dze si daadze bɔ. Dɛm kyen yi yɛ akodzi ho kyen ntsi, wɔbɔ no ber a biribi esi anaa asafomba rogor. Odur ber a asafomba rogor a , wɔfa hɔn afadze nyina, mekyerɛ hɔn akyen ahorow, hɔn ntar, na hɔn mfrankaa. Sɛ frankaatunyi no si guamu na ɔresaw a, wɔdze asafokyen gyegye n'asaw no ho kasa no. Sɛ Ɔhen, Okunyin anaa Ɔberempɔn bi si guamu dɛ ɔresaw wɔ ber a wɔrogor asafo a, Ɔkyerɛma no dze asafokyen keka nsɛm huam dze gyegye n'asaw no ho ma no. Sɛ ɔko si, ogya tɔ ɔman mu, owu anaa asɛm kɛse bi si ɔman no mu a, asafokyen kasa ma amamfo no enyi ba hɔnho do na wotu ho anamɔn. Sɛ asafokyen rebɛkasa a, odzikan frɛ ɔman no, osiandɛ ɔman anaa kurow biara wɔ no huandzin a wɔdze huan no. Mfatoho: Sɛ ɔkyerɛma pɛ dɛ ɔyan kyerɛ Abɛadze Ekuropɔmfo a, ɔfrɛ ɔman no dɛ:

Asɛnka! Asɛnka! Asɛnka!

Asɛnka mfrɛ yie!

Ɔfrɛ no ekyir no, sɛ obi na oewu a, asafokyen ka dɛ:

Fun abasa gu n'akoko!

Osimesi dae a, ɔannsoɛr!

Hom mbra! Hom mbra!

Hom mbra pɔn, pɔn, pɔn!

Iyi ekyir no, ɔkɔ do dze kyen no ka mpanyin kasa na abɛbusɛm pii. Bi nye iyi:

Oedzi ako atɔ!

Ɔkatakyi atɔ!

Damirifa due,

Damirifa due, due!

Nyimpa bɛyɛɛ bi

Na ɔammbɛyɛ ne nyina

Osimesi, Damirifa due.

Sɛ wɔrobɔ asafo ma Ɔhen, Oberempɔn anaa Okunyin bi si guamu dɛ ɔresaw a, Ɔkyerɛma no tum yan kyen no dze ma no

Mbo, Mbo, Mbo apeafo!

Tutu kɔ, tutu bra.

Nkuma nkuma brɛbrɛ!

Mbo a enyaado, Ɔkyerɛma ba!

Mbo a Akudɔntɔ!

Etumpan

Etumpan yɛ akyen ebien, Onyin na Ber. Ber no si nyimfa na Onyin no si bankum. Wɔdze dɛm akyen ebien yi ka frɔm ebien, aprede ebien na dawur ho ma wɔdze gor Mfantsefo ayer a wɔfrɛ no fɔntɔmfrɔm. Wɔdze etumpan ka nsɛm pii kyerɛ Ɔhen na amamfo no. Wotum yan etumpan wɔ ber biara, dɛ ɔyɛ enyigyeber, awerɛhowber, afahyɛber anaa ber a wɔregye Ɔhen enyi. Wotum dze kasa kyerɛ Ɔhen na dɔm wɔ eguabɔ ase. Sɛ Ɔhen anaa Sɔfopanyin resaw fɔntɔmfrɔm a, wɔdze no huandzin na wɔdze tonton no. Etumpan nye akyen a wɔdze bɔ Ɔhen Kokroko, mekyerɛ Otumfo Nyankopɔn abɔdzin, dze tonton no, na wɔdze huan no huandzin ahorow.

Nsɛm a wɔdze etumpan ka kyerɛ Nyame no bi nye:

Ɔkrɔnkrɔn Nyankopɔn

Yɛdze etumpan bɔbɔ Wo abɔdzin

Woana na ɔnye Wo sɛ? Woana na ɔnye Wo sɛ?

Wɔ sor nye asaase, woana na ɔnye Wo sɛ?

Wimu Sebɔ e! Bura mu Gyata!

Wo dzin nye Ɔdomankoma

Wɔfrɛ Wo Mara nye Mara!

Ehu-Abɔbrim! Ehunenyankwa!

Kasaperɛko Nyame e!

Eyɛ krɔnkrɔn, krɔnkrɔn, krɔnkrɔn

Frɔm

Ofi fɛtɛmfrɛm mu. Ɔkyerɛ konyim a yɛbɔ dze kaa atsetsesɛm. Frɔm yɛ kyen kɛse tsentsen kor a wɔdze nkɔtɔkorba ebien bɔ. Ɔkyerɛma bɔ kyen yi dze gyegye ahemfo na ekunyin taataa na wɔdze ka adɛfɛdɛfɛsɛm kyerɛ hɔn. Wɔbɔ wɔ ber a Ɔhen anaa Sɔfopanyin bi rebɛtsena ase wɔ eguabɔ ase anaa oesi guamu dɛ ɔrebɛsaw. Nsɛm a wɔdze frɔntɔmfrɔm ka no bi nye; Nana brɛbrɛ, tɔbo tsiatsia, tutu w'anan ebirɛponmu, Woara W'asaase a na pii a ɔkeka ho. Nyia ɔyan kyen no kosa ne tam na ɔtoto no kɔn dze n'enyiwa na ne nfafakuwa nyina dzi dza ɔreyan no ekyir. Frɔm yɛ kyen a odzi akotsen wɔ fɔntɔmfrɔm no bɔ mu.

Kyen Sin

Kyen sin yɛ kyen bi a onnyi nua, Kyen sin bi wɔ hɔ a, senyaa yabaa nketsenketse bi a dadze nkaba pii hyehyɛ ano bɔ enyim. Dɛm dadze nkaba no ma ngyegyee kyɛn, kyɛn (anaa San, san) bi ba kyen no ne ndze mu ber a wɔrobɔ no.

Wɔbɔ kyen sin wɔ ahemfie ber a Nana rohwehwɛ ne mpanyimfo nye hɔn adwen. Dɛm ber no wɔbɔ kasa yi.

Fir tsetse, fir tsetse, fir tsetse

Fir tsetse ɔdomankoma!

Wɔmbra, wɔmbra!

Tsir kor mmpam!

Tsir kor nnkɔ egyina!

Sɛ Nana tse ne mamfo mu a, wɔdze kyen sin tum huhor no dɛ:

Kyerɛ ɔsor, kyerɛ asaase,

kyerɛ Bosompo,

Kyerɛ ɔdomankoma

Obi nnyi hɔ!

SƐ wɔdze kyen sin dzi Nana n'ekyir rokɔ eguabɔ ase a, asɛm a kyen no ka nye dɛ

Ɔhen nantsew brɛbrɛ!

Brɛbrɛ, Nana brɛbrɛ!

To wo bo tsiatsia, tsiatsia.

DONDOHEN

Dondohen yɛ kyen a ɔka akyen enum ho ma ɔyɛ esia a, wɔdze gor mpintsin. Dɛm akyen enum no nye ndondo ebien (kɔnkɔn na pa-pa -pa- kusi amba), adamka ebien (onyin na ɔber) na gyamadudu (kyen tsetsen a, wɔfrɛ no brɛkɛtɛ). Dɛm ayer yi yɛ 'Tukɔr' ayer. Mpanyinmfo dze fii Takyiman bae. Wɔgor ayer yi wɔ ber a Nana fi ne pia mu rupue abɛtsena famu.

Asɛm a dondohen ka nye dɛ :

Nkɔ nkɛfa mba!

Akyen nkaa no gye do dɛ:

Guannam taa hɔ

Na mban, mban!

DAWUR

Dawur yɛ edwindze a ɔtomfo abɔ a wɔdze dzi dwuma wɔ ayer ahorow pii mu. Dɛm ayer yi bi nye asafo, bɔsoɛ, osuode, kodzi na pii a ɔkeka ho. Dawur yɛ edwindze a dawurbɔnyi bɔ na odua do dze nsɛm anaa nkaabɔ ma amamfo. Iyi yɛ ndɛ dza yɛka no wɔ pɔtɔ kasa mu dɛ,

"Information Ministry" no. Asɛm anaa nsɛm biara a ɔhen anaa amampanyimfo pɛ dɛ wɔka kyerɛ ɔman no, wodua dɛm asoɛ yi do na wɔdze nsɛm ma amamfo no. Wɔ kodzigor mu no, dawur kasa dɛ:

Wɔma yɛmfa hɛn nkokɔ

Wɔ bɔsoɛ na osuode mu no, asɛm a dawur ka nye yi:

Ka mbɔr a, nntɛfer ta!

Mbofra, mbofra wɔhwɛ

Dondohen

Dondohen yɛ kyen a ɔka akyen enum ho ma ɔyɛ esia a, wɔdze gor mpintsin. Dɛm akyen enum no nye ndondo ebien (kɔnkɔn na pa-pa -pa- kusi amba), adamka ebien (onyin na ɔber) na gyamadudu (kyen tsetsen a, wɔfrɛ no brɛkɛtɛ). Dɛm ayer yi yɛ 'Tukɔr' ayer. Mpanyinmfo dze fii Takyiman bae. Wɔgor ayer yi wɔ ber a Nana fi ne pia mu rupue abɛtsena famu.

Asɛm a dondohen ka nye dɛ :

Nkɔ nkɛfa mba!

Akyen nkaa no gye do dɛ:

Guannam taa hɔ

Na mban, mban!

Dawur

Dawur yɛ edwindze a ɔtomfo abɔ a wɔdze dzi dwuma wɔ ayer ahorow pii mu. Dɛm ayer yi bi nye asafo, bɔsoɛ, osuode, kodzi na pii a ɔkeka ho. Dawur yɛ edwindze a dawurbɔnyi bɔ na odua do dze nsɛm anaa nkaabɔ ma amamfo. Iyi yɛ ndɛ dza yɛka no wɔ pɔtɔ kasa mu dɛ,

"Information Ministry" no. Asɛm anaa nsɛm biara a ɔhen anaa amampanyimfo pɛ dɛ wɔka kyerɛ ɔman no, wodua dɛm asoɛ yi do na wɔdze nsɛm ma amamfo no. Wɔ kodzigor mu no, dawur kasa dɛ:

Wɔma yɛmfa hɛn nkokɔ

Wɔ bɔsoɛ na osuode mu no, asɛm a dawur ka nye yi:

Ka mbɔr a, nntɛfer ta!

Mbofra, mbofra wɔhwɛ

Ber a Wɔnyɛn

Ɔkyerɛma nyan anapa, ewiaber, ewimbir, afahyɛber na ahensi ase. Sɛ yɛdze iyinom so to nkyɛn a, dza odzidzi do yinom yɛ ber a Akanfo yan;

1. Ber a Ɔhempɔn bi akɔ ekuraa

2. Ber a wɔrema nkaabɔ

3. Ɔko ber

4. Ber a esian bi esi tse dɛ ber a obi ayew anaa obi ne nsa apa.

5. Ber a Ɔhen bi rekaa n'ewuakɔr

6. Ber a Ɔhen bi rusuae kyerɛ ne mamfoe

Bea a Wɔnyɛn

Bea wɔyan na odzidzi do wɔ ha yi:

1. Ahemfie

2. Eyiase

3. Posuban ho

4. Abosomfie

5. Akono

Ayan Ne Nhyehyɛɛ

Ayan ne nhyehyɛɛ yɛ soronko a ɔma ɔyɛ dansewa fi anokasadwin nyina ho nye iyinom:

1. Kyen kasa wɔ awensɛm su. Wɔhyehyɛ asɛm no wɔ awensɛm kwan do

2. Nsɛm a ɔkyerɛma no ka no yɛ ntsiantsia

3. Ayan wɔ kasa nsido/ntsimu. Ɔkyerɛma no taa si asɛntsitsir a ɔpɛ dɛ ɔdze to gua no do.

4. Ayan mu nsɛm pii taa yɛ nkasafua nkakuwho. Ɔkyerɛma no du nsɛm do a, ɔbobɔ ma ngyegee bi da edzi

5. Abɔdzin na nsabran mmpa mu da.

Ayan Ho Mfaso

1. Yɛdze ma nkaabɔ

2. Yɛdzɛ kyerɛ ber

3. Yɛdze tonton anaa huhor nyimpa etsitsir, ahemfo an aberɛmpɔn

4. Yɛdze to nkra (dze bɔ amandzɛɛ)

5. Yɛdze frɛ dɔm ber a asɛmyaw na asɛmhia bi esi

6.Yɛdze bu bɛ

7. Yɛdze da ɔman n'abakɔsɛm so edzi

Mboaedze

Agyekum, Kofi (2000). Aspect of Akan Oral Literature in Media; Research Review Vol. 16(2): 1- 18 Institute of African Studies Legon.

Krampa, D. E. K. (1997) Mfantse Kodzisɛm ho Adzesua. Accra:Bureau of Ghana Languages